شنو غادير إلى تهزيتي في القرعة؟

 

خاص إكون الباسبور موجود.

أولا : كاتعمر واحد الإستمارة سيمتها DS 260، و بحذر و تتفادى الأخطاء، لأن أي خطأ قد يكلفك الكثير. 

ثانياً: كاتأكد بلي خرجات لك confirmation في إميل ديالك كاتيلشارجيها و كاتحتافظ بها.

ثالثاً : من بعد أسبوعين أو شهر كايرسلو لك إميل كايقولوا لك بلي درسوا لك DS. 

رابعاً : إلى عاودتي دخلتي و راجعتي DS ديالك و لقيتي بلي راك درتي شي خطأ إلى كان بسيط بلا ماتحاول تفتح DS.

خامسا : إلى كان رقمك صغير رآه غادوز المقابلة في الأشهر الأولى من المواعيد، فاش اجيك الموعد أول حاجة كاتصل بالطبيب كايعطيك موعد و من الأفضل إكون قبل المقابلة، المهم رآه assistant غاتقول لك الوثائق لي خاصك تجيبهم يوم الطبيب.

سادسا: كاتجمع الوثائق ديال المقابلة و كادير لهم ترجمة، و خصك تأكد بأن ماكين تا خطأ في الترجمة.

سابعا: كاتمشي كادوز الطبيب إلى صحتك كانت جيدة كايعطيك واحد الملف كاتديه يوم المقابلة للقنصلية. 

ثامنا : يوم المقابلة هي أسهل مقابلة غادوزها في حياتك و أصعب مقابلة حيث هي لي غاتحدد لك واش مقبول ولا مرفوض ولا إجراء إداري... 

تاسعا : المهم كاتدي الوثائق ديالك و كاتلبس مزيان، من الأفضل أنه بلا ماتلبس الخاتم ولا شي سنسلة ولا شي حاجة فيها حديد، و المحافظة ديال الظهر بلا ماتديها أصلا حيث ماغيخليوكش دخلها. 

عاشرا: واخا ضروري كايكون ذاك الستريس ولكن حاول ماتبينش و من الأفضل تهضر مع الناس لي جايين تا هما ادوزو باش تواسيو بعضياتكم. 

من بعد كاتخلص كاتشد نوبتك تا كايعيطو لك اللغة نتا لي كاتختار اشمن لغة غادوز بها، من بعد ثيق فراسك و جاوب على قد السؤال و حاول ماتعطيش التفاصيل بزاف تا اسولك القنصل. كايسولوك غير اسئلة عادية من بعد كايقولك القرار ( مقبول، مرفوض، قرار إداري)، فاش كايقولك مقبول من بعد سيمانة تقريبا كايعيطو لك تأخذ الفيزا ديالك. 

بالتوفيق للجميع.