السلام عليكم بما ان نتائج القرعة على الابواب بغيت نعطيكم شوية د motivation ونعاود ليكم كيفاش جيت
مهم انا في 2020 كنت طالعة هابطة في أنستا ( يامات كرونا وليزيكزام تأجلو لشهر 10...)
مهم طالعة هابطة كيطلع ليا اعلان دالقرعة بلي بداو التسجيل تما تاني مرة انسمع بالقرعة بعد بوشعيب و فتيحة( الفيلم المغربي) دخلت كنقلب كنلقا خاصني باسبور وانا معنديش بقيت كنفكر كنبقا نقرا تا كطيح ليا القرعة فراسي قلت انوض نقاد الباسبور و ندفع هي هاديك قاديتو ما جا فين يخرج ليا تا دوزت ليزيكزام... بقيت كنقول اليوم نتسجل غدا نتسجل بحكم مكانش عندي pc وخاصني نمشي لشي سيبير ولا شيحاجة بقيت اليوم غدا قاتلني العݣز تالنهار الاخر عاد مشيت عندي واحد المكتب كان بان ليا ديجا فيه اعلان باي كيسجلو ...
ديت معايا باسبور و تصويرة ( كان دارها ليا المصور في سيدية) حيت مكنتش عارفة و معندي فكرة على والو مجانيش الفضول نعرف تصويرة كيدايرة كيعطاها ليا المصور خبيتها تا ديتها تسجلت بها و من بعد بقات ملاوحة تا تجلات لدبا مشفتهاش هداك النهار كان اخر نهار و كان قاليا نيت بقاو 6 سوايع باش يسالي تسجال كنت تسجلت مع ديك 10.30 صباح
هي هاديك نسيت داكشي داك العام كانت عندي الإجازة وصافي ركزت غير على القرايا و مرة مرة فاش كطيح ليا في بالي كنقول ان شاء الله علاش لا نتهز مي مكنتش دايراها في بالي حيت مكنتش داخلة للݣروبات و مكنتش كنعرف شيحد ديجا تهز بها... مكانت عندي تا معلومة عليها هي هاديك وصلو نتائج واحد صاحبتي قالت ليا دخلي شوفي عاد بديت كنقلب على سيت فين نشوف ... ( كنت عارفة النتائج في شهر 5 مي اينا نهار معرفتش واخا كان الدري اللي سجلني عطاني ورقة فيها confirmation number وفيها كلشي مي مقريتهاش طويتها و خبيتها عند ماما هادشي ماشي الا مبالاة كي مكنتش تايقة في هادشي قلت منعرف واش بصح ولا لا) هي هاديك لقيت السيت و صونيت لماما يصورو ليا الورقة حيت ساكنة بعيد على الدار مهم هادشي في رمضان ولقيت راسي تهزيت مفهمت والو بقيت مصدومة شوية عاد فرحت من بعد عاد دخلت كنشوف ليڤيديو في يوتيب... عاد عرفت ds260 و case number...دخلت نشوف رقمي لقيت 2022AF00029030
رتاحيت شوية
عمرت ds بوحدي بحكم كنت خديت pc على وديت pfe
تفرجت في ليڤيديو عمرت داكشي ساهل بزاف ( نسيت العنوان كان عطاه ليا واحد الدري متهزش كان طالبو لواحد البنت فحالة تهز واعطاني نمرتها دويت معاها و عطاتو ليا)
داز شي شهر هكاك لقيت بلي الباسبور تقاس ليا بواحد الپرودوي وخفت ميقبلوهش هي باش بدلتو و مكنتش عارفة حليت ds عاودت صيفطتو في شهر 8 علما اني في اللول صيفطتو بكري في السيمانة اللولة تما انكحلها و ايتعطل عليا داكشي واخا كنا العشرينات منحوسين كانو ارقام كبار عيطو ليهم و حنا بقينا مع الاخرين انا بعدا صافي وصلات شهر 5/2022 بديت نساها و صيفطو ليا الموعد تا شهر 8 كانو عطاوني ندوز في شهر 9 /9 تما تاني اتبدا معاناة الطبيب وشهر 8 اغلبية كونجي مهم في الاخر شديت مع الفهري نهار 6/9 من بعد عراقل حيت كنت خديت 2 مواعد واحد معاها واحد مع جناح
وحيدوهوم ليا ب 2 من في الاخر من بعد الطليب والرغيب عطاتني موعد اخر
وداز كلشي مزيان الحمدلله نهار الطبيب
وصل يوم المقابلة كنت بايتة في كازا وكان عندي الموعد مع 8 صبااح هي هاديك من بعد بزاف دالاجراءات في الدخلة ...دخلت وصلاتني النوبة دوزت عند السوري بالعربية سولني هاد الاسئلة بالضبط
فين اتسكني في امريكا قلتلو مع المستضيف( بس كنت بدلت العنوان نهار المقابلة درت ديال واحد الولد عرفتو من بعد ) بس خاصك تجاوب ب غنسكن مع المستضيف واخا متسكنش معاه
السؤال تاني اش كيجيك جاوبت صديق
السؤال التالت شحال عندك دالفلوس جاوبت 5000$
السؤال الرابع منين جاتك جاوبت خويا عطاهالي
سؤال الخامس فايت ليك خرجتي المغرب الجواب لا
السؤال السادس شحال من مرة دفعتي القرعة الجواب مرة وحدة
واخيرا عطاني ورقة وقالي مبروك ڤيزا مقبولة ( اي واحد فيكم كنتمنى ليه يسمع هاد الجواب ان شاء الله)
ساليت تقريبا مع 7.45 حيت واخا عندي 8 كيدخلو بكري
داك نهار فرحت بزاف وفرحت دار ...
من بعد ايبداو معاناة نقلب على الكرا حيت معندي تاحد تما
والمستضيفين ب 2 كنت بغيتهم غير على ود العنوان بقيت كنقلب في فايسبوك تالقيت الكرا الحمدلله جيت في الاخر د شهر 10 بالضبط نهار 30/10/2022
السيدة عطاتني الكلمة بلي البيت ديالي و تا انا عطيتها الكلمة انمشي عندها
هي هاديك وصلت المطار داك نهار د نيويورك تلفات بيا الدنيا بقيت كنقول فين انمشي و فين انعطي براس وانا مكنعرف تاحد هنا قبل منجي كنت فرحانة مي غير وصلت عالم اخور دارت بيا الدنيا
مشيت شديت طاكسي عطيتو العنوان كنت كاتباه في ورقة طريق كامل و انا كنفكر في اللي جاي اش كيتسناني...
وصلني لقيت السيدة كتسناني دخلت نعست ههه
الايام اللولة شحال من مرة كنتلف مي من بعد عناء كنرجع للدار كنت كنقضي شغالي بوحدي و كتقلب على خدمة
والحمدلله لقيت خدمة في 25/11/2022 و تما اموري بدات كتقاد شوية بشوية الحمدلله
دبا 5 اشهر وانا هنا الحمدلله حياتي غادا مزيان واخا شوية دالقنط مي درت شيحوايج كون بقيت في المغرب مكنتش نديرهم في هاد المدة
والحمدلله
الله يسر ليكم يارب و دوقو تا نتوما هاد الفرحة يارب
إرسال تعليق