يا هلا وسهلا عدنا اليوم غادي نسافروا فالطيارة كاين شوانط جمعتوا شي حوايج ديتو معاكم شي ماكلة من المغرب هو فعلا احساس روعة بمكان يلاه ربطوا حزام الامان الطائرة سوف تقلع بعد قليل ولكن بلاتي اش بان ليكم نرجعوا شوية للوراء ربما تستافد من هادشي لي غادي تشوف يلاه توكلنا عالله
بسم الله الرحمن الرحيم . ايوا الشاف كنا وقفنا ف اخر بوسط انك خاصك تجمع شطايطك وماتباتش هنا.. واش عارف اش غادير بعدا من بعد ما تسالي جميع الاجراءات الادارية. را باقي مابلغك البارد غا صبر ها حميد جاي . دابا خاصك تقطع الطيارة من بعد ماتكون حددتي فين غادي هادي خطوة جد مهمة هي لي غادي تحدد البداية ديالك كيفاش غادي تكون ! اييه يا إما غاتوصل تلقاها باردة وساهلة او غادي تمرمد و تسخط. راه شحال من واحد . ماقدرش بزطط ورجع لبليدة. غا هو لاتبعني هادشي لي غادي نقوليكم غادي توصلوا ألييز ب لاباليز وجايبين معاكم الفريز.
حل ودنيك قبل ماتقطع خاصك تكون زكيتي امورك مزيان و البشار راه كنهدر على المستضيف! واش عندك ؟! عند من غاتمشي يستقبلك ولا غا حال فمك فامريكا تا بالرب تا غادي دوز عليك بلا مستضيف. من هاد المنبر اللهم تعالى يلاقيك مع شي ولد الدار الكبيرة . يجيبك من المطار ويديك للدار ترتاح . ويديك تقلد اوراقك ونقلب على خدمة ودوز بيرمي ويزعمك طلق داك اللسان المكنزز عندك . راه اللغة الانجليزية بحال الما هنا خاصك اوبليجي الملاوي .
عطيني عقلك غادي تفكر منك بعد تقطع الطيارة. وهنا فين كايتقولب بنادم . عنداك تمشي دير ليسكال راه فيه بزاف د المخاطر منها انك تقدر تهبط فشي دولة ونتا معندكش Visa transit سير قلب على هادشي لي قلت ليك باش تاخد فكرة . نصيحة قطع ديريكت مع محبوبة الجماهير* الخطوط الملكية المغربية. عرفتي علاش ؟! حيت الرحلة آمنة وديريكت من بن احمد لعند بايدن من الحمارة للطيارة وعندك امتيازات منها انك عندك الحق ف جوج شوانط كل
وحدة فيها 23 kg + شانطة ديال 10 كيلو تقدر طلعها معاك للطيارة + صاكادو دير فيه وراقك وشي PC ولا شي حاجة . يعني 23+23+10 + صاكادو تاهو عمروا ماتخافش قليل فين يقلبك . سير قطع من السيت ديالهم مباشرة ماكاين لا skyscranner لا زمر وسير خلص فواكاش فالبلاصة يعطيوك توصيل الأداء و شوية توصلك تدكرة الطائرة فالايميل سير طبعها وخبيها عندك تقدر تبقا معنقها ماكاينش مشكل. لادرتي من غير هادشي غانقوليك أ مسيكة حيت يقدر يقدر يوقع شي خلل لابغيتي متلا تخلص بلاكارط ويصدقوا قاطعين ليك جوج مرات وتبقا محنسر فالمروك . و نصيحة اخرى قطع على تيساع حيت كاتكون التيكيتة رخيصة ولاقظرتي تجي فوقت البرد والشتاء تما تقدر تجي غا ب 4000درهم.
هاااا دابا خاصك غاتجي لمطار محمد الخامس . ويامحلاها فرحة وحزن فرحة حيت غادي تغير حياتك 360درجة .وحزن حيت غادي تخلي لميمة الحنينة والواليدة مسكين شحال ضرب عليك تمارة تا كبرك وهانتا غادي تمشي وتخليهم والوقت والزمان. امريكا بعيدة وتدكرة الطيران بعض المرات كاتولي مستحيل تقدر تقطع شي وقت وصلات ل 3 المليون . دير بعينك انك غادي تخدم وتبادل حياتك ولكن يا ويلك تسما امك و ابوك عقل عليهم فاش كنتي حازق شحال صوفاوك صدقني فاش وصلت الكتابة هنا عيني غرغروا تفكرت الوالدة الدموع غابهبطوا . تهلا فوالديك ماتخلي تا وحدة ولا واحد يمنعك. كون راجل المرة معاهم تهلا ....
وصلتي المطار لي من المفروض خاصك تكون فيه 3 سوايع قبل موعد الطيارة باش يلاه دخل تعرف اس واقع لداخل واكمل اجراءات( وزن الحقائب+ دخل من هنا خرج من هنا ... . اخر محطة هي فاش غادي يقوليك سير لداك المدرج تسنا وقت الطائرة. هاه بالمناسبة جيب معاك ماتاكل قبل مادخل المطار . حيت دوك الناس كايبيعوا بتمن اكتر من ديك الدولة لي غادي ليها الشوااااية . متلا Chips ب 80 درهم قرعة الماء ب 40 درهم تقول غادي يديماريو بيه الطيارة . واحد الشوية غاتسمع فاالميكرو الطائرة المتوجهة الى عين السبع سيدي مومن الزرقطوني ستدخل المحطة بعد قليل تا لا غاضاحكين . هنا غالبا كايوقع واحد البلان مع الخطوط ديالنا .هو غادي يقوليك راه الطيارة غادا تعطل شوية خخخخخ سبحان الله تا غادي نخوي ليكم هاد البلاد عاد غادا تعطل . ايوا شنو غانديرو ليك الشريف صبر معانا. واخا الطيارة غادا دير 8 ساعات
✓ ممنوع تدي معاك السوائل واخا فصراحة انا ركب حدايا واحد داي بيدو د الماء مسخوط
√ممنوع شي ريحة
دير حزام السلامة وماتحيدوش الطريق عامرة فالسما ماتعرف
غادي يعجبك الحال ابوراس الطيارة عالم اخر عاود ماتخافش ماغادي تحس بوالوا . غير دوك كيلي ميني
هوما لي خوافة . خاصك تعرف ان اكتر وسيلة مامنة. هي الطيارة والمغاربة عندهم بيلوطات ناضيين حيت خاطبينهم شي وحدين
غادي يعطيوك الماكلة فالطيارة جوج وجبات غادي ضربهم تكهم . الماكلة نقية وبنينة صراحة د الله
تاي تاهوا حاضر وسط الطيارة. يلاه يلاه نوض نوض جمع راسك راه طولنا فالطيارة واش تسحليتيها ولا . ايوااا مبروك هانتا وصلني لمطار نيويورك او واشنطن على حساب شمن قرينة غادي . غير توصل خدم الويفي ديال المطار هدر مع امك اولا وابوك قوليهم
hi How are you؟!
من انتم تا لا عنداك ديرها راك باقي مغربي . شوف هنا راك فامريكا بلاد القانون عنداك تغلط ودير فيها قافز. شد الصف وجبد معاك ديك الإنجليزية لي عييت نوصي فيك بها. اقسم بالله هنا غادي تفكر دوك الايام لي ضيعتي فالخوا الخاوي هما السلاح ديالك هي اللغة وعقل عليها مزيان انا غادي نعاود نرجعك لهدرتي. غادي توصلك النوبة باش طبع الباسبور.
عند ضابط الهجرة وغادي تكون هاز معاك داك الملف الطبي الاصفر باش يعرفوك من صحاب القرعة . ركز مزيان هنا لايحرج عليك داك ضابط الهجرة كيفما دار ليا. علا ماشي ولد الخشبة غلط ليا فالعنوان وبسبابو تعطل عليا social security ماتخيلوش المعاناة لي دازت عليا بلا social security ركز معاه مزيان حيت غادي يقوليك عطيني العنوان فين غادي .وخاصك تكون موجودوا فشي ورقة وتأكد يكون صحيح . من بعد مايطبع ليك فيها عفوا بغيت نقول فيه .
غادي تخرج برا . تالتا ايوا فيناهوا المستضيف. هنا غادي تعاود ترجع تفكر البوسط لي كنت كناكد عليه على المستضيف. عندك مرحبا غايهزك نيشان . ماعندكش عليك اولدي بطاكسي ولا شوف فين تتا اصلا غادي يا المسخوط لي جاي بلا مستضيف. على اي حال مايبقاش فيك الحال حيت اصلا هنا عندك الله بوحدو و دعيوات الوالدين . عزف على راسك عندك اللغة غادي يجيك كولشي بحال السلام عليكم. ماعندكش غاتبقا اب اب اب بحال الزيزون. تا راه هنا كايصرطوا اللغة الانجليزية اساتدة او وحلوا فالاول . سير قرأ اللغة الانجليزية لكنتي باقي كاتقرا هاد البوسط . شوف شحال من مرة عاودتها ليك راسك قاصح غاصبر مازال غادي تاكل العصا بلا بها.
ايوا يا حميد تعالى مص ليك شي مصيصة من هادا
وصلتي رتاحيتي ايوا نوض تقعد ها الخدمة غادي تبدا. غادوز واحد سيمانة او اقل او اكتر غادي يوصلك social security . الا تعطل عليك شي عندهم وهنا دور المستضيف يديك ويجيبك ويترجم ليك لا كنتي زرق. فهاد الوقت عندك اختيار تخدم cash بيدما وصلاتك ل green card حيت باش غادي تخدم social security تا هو مهم ولكن ماكافيش. غادي نصحك هنا على حساب وضعيتك كنتي جايب معاك عمااار بلاش ماتخدم عند العرب حيت غادي يعطيوك 7 او 9 دولار للساعة وغادي يحوفروا عليك ديال بصح. سير تمتع بالطبيعة وبقا دخل وتقدا من store . هنا ف امريكا الناس تقة لدرجة لا تتخيل. غادي تخلص بيدك منك لشي آلة . وعندك الحق ترد اب حاجة شريتيها وماعجباتكش اييه الشريف وراهم كاعما كايقلبوها كوم غا تقة نتا
غاتشوف الناس الزوينة كيفاش كتعامل. فينما دزتي من حد شي حد كتلقاه كايضحك معاك الابتسامة هنا هي جواز سفر القلوب . كولشي غادي يقوليك please.sorry غاتبقا تسمعها اكتر من 100 مرة فاليوم . تقدر دوز من حداك شي نقرة فين يغير نحاسك الزمر وضحك معاك . عنداك تبقا حال داك الفم لا تلقا راسك فالعمبوكة راه غير دارت معاك الصواب
ماشي بحال الموسطاشات لي خليني فالبلاد غا ضحك معاها تقول لصحابتها اويلي اختي زيدي زيدي الناس هنا اللوز مدردر بالكركاع . كون غانتا خصيم وبدل العقلية. كنصحك تبقا دخل للسطورات واي حاجة فيها الناس بزاف باش تحيد الخلعة والخوف والارتباك . ماديرش بحالي انا كنت كانبقا بالجوع حيت خايف يبقا يسول فيا ويدخل معايا فالمسقي ونبقا غانبربق فعيني. لا أجواد زعم زعم هدر اي كلمة طلق لسانك . صدقني الى مازعمتيش غادي تبقا فبلاصتك وعمرك تعلم اللغة لي هي علاش داير الفيلم هنا.
يلاه بركة عليك خرج بدل البلاصة . أجي علاش ماتمشيش ل downtown (وسط المدينة) الله بسلام هاكا دايرا روعة بمكان. غاتلقا الناس عفوية . ماكين لا حضية فطور بالشوفان... كل واحد دايها ف ... راك عارف. وماحدك غادي سير ركب ليك فالباص باش تعرف البلايص باش تسارا وتصور مع راسك حيت غادي تلقا شي مناظر بياخدوا العأل . الطوبيس ب 2او 3 دولار وحاليا كاين فابور فشي ولايات. غاتلقا دوك العمارات الطوال سير ضرب ليك شي تصويرات . تمتع ليا مع راسك حيت غير غاتوصلك green card غاتولي كاتمنى شي وقيتة تخرج فخاطرك . هنا فامريكا 🇺🇲 العمل تم العمل تم الاكل تم النوم . الشعب الأمريكي كايخدم باش يمشي للريسطو يمتع راسو يصحابك بحال المغرب بنادم خدام فالكابلاج ب 40 الف وجامع 10 المليون كيدار ليها والله ماعرفت. واتهلا فراسك الدنيا حدها هنا.
من بعد 30 يوم او اقل او اكتر غاتوصلك green card لي نسيت ماقلت ليك انك تاتجي هنا عاد خلص تمنها 220رهم خليك تاتجي عاد خلص .شي وحدين كايديرو فيها مطورين كايخلص من المغرب زعما باش يسرع الإجراءات فاللخر كايلقا ان هنا لي احسن حيت تاكدخل للاراضي الأمريكية عاد كيبداو معاك فالوراق. المهم ملي غاتوصلك هنا راك وليتي مواطن أمريكي تقريبا عندك جميع الحقوق بحال المواطن الاصلي باستثناء ماعندكش الحق تصوت فقط اما اي حاجة من حقك . ايوا اراك دابا لمشوار البحت عن عمل . ماتخافش الخدمة هنا
دخل من هاد الباب خرج من لاخر لعلك ترضى وجد راسك لتمارة. عوتاني عندك اللغة غاتلقا خدمة ساهلة وفيها الصرف . ماعندكش ياك. قلت ليك راك صكع . غاتخدم فاش ماكان غالبا شي مطعم ولا شي سطور ضرب تمارة على قلبك يصحابك غاتجي تلقا خدمة فالبيت الابيض . راه امريكا حلاوتها غير دوك الإجراءات
كنتي بوحدك خدم جوج خدمات. جمع الدولار. وهنا غادي نوقفك باش نقوليك ان الطوموبيل هنا شبه مستحيل تعيش بلا بها . لاقدرتي تجيب معاك شي 5 او 6 المليون تاخد شي طوموبيل بعقلها و.نقية لي ماتخليش تصاحب مع الميكانيك .ماتيقش بهادوك لي كايقولو ليك الطوموبيلات رخاص غا 2 تجيب ليك . اييه غاتجيب ليك شي برويطة مسائية مريكان او اوربا.
السيارة هي كولشي هنا. غادي تخدم بها ببريكولات مخيرين بيدما تقدام هنا شوية وتعرف قوالب الخدمة.
ماتنساش تهلا فوالديك. وجمع راسك بعد من البلية. الخدمة لي عامرة بالعرب والمغاربة لاروب بعد منها قدر الإمكان. سد فمك . ساوي مع البشرية . شوف وسكت . ماعندك مادير بالصحاب. دير علاش ترجع.
الصرحة عييت بالكتابة اش بان ليكم البوسط جاي نكمل ليكم . جاني النعاس اخاوتي تسناو البوسط جاي فيه شي نصائح من دهب . وفيه كيفاش تعيش مرتاح هنا بلا مشاكل.
ماتنساوس دعيوات الخير . هادشي العادة مكتوب من القلب الخالص. وعن تجربة
إرسال تعليق