جوابا على أسئلتكم حول القرعة : شحال ديال لفلوس نجيب معايا؟ امتى غادي اخرجوا النتائج؟
جوابا عن أسئلة الاصدقاء لي سولوني اراد داك الباب اللور أجواد ... سييير
1/ شحال ديال الفلوس خاصني نجيب معايا !؟!
جيب معاك اكبر مبلغ ممكن . ولاقدرتي تجيب فلوس الطوموبيل فاك غادي تختصر عليك 95٪ ديال المعاناة
2/ عفاك كنقلب على مستضيف باش ملي تخرج ليا القرعة نكون واحد !!!
خليها تاتزاد ونسميوها سعاد.
3/ عفاك امتا غادي يخرجوا النتائج !؟
النتائج شهر 5 فالاسبوع الاول . غير تعرف راسك ناجح سير عمر استمارة DS260 فأقرب وقت
4/ واش يمكن ليا نتزوج ملي تخرج ليا القرعة.
ايه يمكن ليك . غاهوا احتمال ماتمشي لا نتا لديك الموسطاشة. واش منيتك جاب ليك الله فرصة فين تربي الريش وجايب معاك مشكل . واغاتاتقاد راسك بعدا.
5/ واش يمكن نجيب واليديا وخوتي عندي لأمريكا!؟
نعم بكل تاكيد عندك الحق تجيب واليديك عن طريق فيزا سياحة . اما خوتك خاص يكونوا أصغر من 21 لعام اما لاكانوا اكتر من 21 سنة ف هنا غادي دفع ليهم تجمع عائلي كياخد 15 لسنة تقريبا .
6/ عفاك واش المحجبات عادي يعيشوا هنا ؟؟
علا مال المحجبات زايدين ضلعة .شوف هنا فامريكا الكل سواسية . كولشي يحترم ويستحق الاحترام
7/ واش كاين شي طريقة نمشي بها لامريكا
كاين 3 طرق وهي القرعة تم الزواج تم الدراسة واقرب واسهل حل هو القرعة تم الزواج . اما الدراسة خاصك عالأقل واحد 30k فالكونط .
8/ شنو نوع الخدامي لي كاينين هنا .
فاس غاتجي اول مرة لي لقيتييه غاتخدموا نسا عليك المغرب وشنو كنتي كادير فيه . هنا كتبدا من الصفر اما المغرب مافيهش تا الصفر منين تبدا سبحان الله.
9/ كيفاش غاندوز بيرمي !! او واش البيرمي د المغرب خدام هنا ؟!
هنا كتعاود من الاول . غادوز الإمتحان على حساب الولاية لي جاي ليها كاين ولايات فيهم العربية والانجليزية والاسبانية . وكاين ولايات مافيهمش العربية، غادوز إمتحان الكومبيوتر فيه 25 سؤال خاصك تنجح ف 20 وكاين اكتر من 25 سؤال فبعض الولايات.
عندك الحق تسوق واخا ماعندكش بيرمي سياقة حقيقي ولكن خاص يكون راكب معاك شي واحد عندو بيرمي كامل تم غادوز السياقة خاص تكون عندك سيارتك و التأمين او تجيب شي سيارة دوز بها .
10/ كيفاش غادير بنت جاية بوحدها؟
تجيب فلوس كتيرة وماتيق فحد وتحافظ على شرفها .وماتلحش الكابة للمندجر . حيت عطا الله الخدمة و ياربي تبقا مغربية هدا لا ماقالت ليكم منك انتم ؟
11/ شحال كايتخلصوا للساعة هنا ؟!
على حساب فين خدمتي كاين 12/ كاين 15 / كاين تا 20 دولار ولكن داكشي كايجي مع الوقت .
12/ واش نقدر نبقا نمشي ونجي للمغرب ؟ نعم عندك الحق تبقا 6 اشهر فالمغرب وترجع بحالك ملي تاخد الجنسية الأمريكية بقا نتا فالمغرب كاع فمرة ديك الساعة كاتولي عندك الحق تجلس شحال ما بغيتي فالمغرب و فامريكا
13/ انا 16 لعام وانا كندفع القرعة ماعرفت فين المشكل كاعما بغات تجي فيا ؟!!
القرعة أرزاق ومكاتب الا متكبها ليك الله واخا يوقف قدامك العالم كامل (كن فيكون ماكاين اللعب) ماجاتش فيك ربما ربي شاف انها مافيهاش الخير ليك فلهذا نساو عليكم هاد الافكار ونوض صليو الفجر وطلبوا الله يكتبها ليكم وخليكم قراب لله تعالى لانه ربي كبير وكايحول الاقدار فاي لحظة .
14/ واش المستضيف ضروري ؟
ايه ضروري ومؤكد هو لي يعطيك الانطلاقة فامريكا وغادي يبان ليك واش امريكا زوينة ولا خايبة . فنصيحة قبل ماديماري شوف لي يستاضفك واخا تعرف تخلصوا كاع حيت غادي تكرفص بزاااااف.
15/ واش نجي بوحدي ولا نجيب ولادي من الدقة الأولى؟
هادشي كيعتمد عليك ؛ عندك المستضيف عندك فين تسكن عندك فلوس كتيرة جيب الرباعة كاملة .ماعندكش تكمش وطلب غاتزطط نتا بوحدك
16/ شنو الحرفة لي مطلوبة فامريكا؟!:
اي حرفة مطلوبة على رؤوسهم الحلاقة خصوصا للنساء و حرفة لي مطلوبة بزاف تقني متخصص ف climatisation عندك هاد الحرفة غناك الله هنا
17/ واش 3 او 4 المليون تجيب ليا شي سيارة ؟!
غاتجيب ليك سيارة ولكن مامضموناش ممكن تصدق ممكن تعاشر مع شي ميكانيسيان
18/ واش اللغة الانجليزية ضروري ؟!
اه ضروري لي قاليك تاتجي هنا وتعلمها غير كداب وماعارف تا لعبة . اللغة الانجليزية شي حاجة بحال تقريبا الاوكسيجين. بلا بها غادي تولي بحال شي كاين فضائي ماعارف فين يمشي ولا يجي . غادي تمرمد وحس بالاخراج ديال بصح . اللغة الانجليزية لغة تكتسب ولا تدرس بمعنى بلاما تصدع راسك وتمشي تقرا فهاداك لي كانقولوا عليه صسونطر راك غاضيع غا رزقك .
بغيتي اللغة خاصك الاحتكاك مع الأمريكيين ماخصكش تبقا تخمر بالعربية نهائيا خاصك تخدم مع امريكيين باش تولي كادير مجهود كبييير باش تفهمهم أما داكشي ديال تقرا ولا تفرج فالافلام والاغاني هاديك غير اشاعة مصدقينها الناس .
لا حظ شحال طولت على موضوع اللغة . راك غادي ناكل العصا بلا بها غادي يفوتوك لحظات وفرص كبيرة بلا لغة
19/ واش نقدر نجمع ونشيط شي بركة من خلال الخدمة لي كنخدم ؟؟
ايه لا كنتي جامع وطاوي وطالع للجبل غادير علاش ترجع .فلهذا تفادا تخسر فلوسك فالاكل ديال الزنقة ماتكونش مبلي بشي بلية صيفط لوالديك لابغيتي تنزل عليك البركة .
20/ واش التيليفون لي فالمغرب يخدم ليا هنا ؟
احتمال يخدم او لا . Samsung غالبا خدام ومن الاحسن تاتجي هنا وشري تيليفون .
يلاه كيعاون ربي . دزتي خلي شي دعيوة نعرفوك
إرسال تعليق